ایک نجی ٹی وی چینل نے آغا سراج درانی کے گھر چھاپے کے دوران تحویل میں لی گئی چیزوں کی تفصیلات حاصل کرلیں ۔ نیوز چینل کے مطابق نیب حکام نے اسپیکر سندھ اسمبلی آغا سراج درانی کے گھر سے چھاپے کے دوران جائیداد ، گاڑیوں اور گھروں سے متعلق اہم دستاویزات حاصل کیں جب کہ گھر سے جو چیزیں تحویل میں لی گئیں ان سب کا سیزر میمو بنایا گیا ہے ۔
نیب ذرائع نے بتایا کہ آغا سراج درانی کے اہلخانہ کے سامنے سیزر میمو بنایا گیا جس پر ان کی صاحبزادی سے تصدیقی دستخط کرائے گئے ۔ نیب نے اسپیکر سندھ اسمبلی کی صاحبزادی سے زبردستی دستخط کرانے اور اہلخانہ سے کسی بھی قسم کی بد سلوکی کی سختی سے تردید کی ہے ۔ نیب ذرائع کا کہنا ہے کہ آغا سراج درانی کے گھر سے حاصل چیزوں کی فہرست عدالت میں پیش کی جائے گی اور عدالت کو تمام معاملے سے آگاہ بھی کیا جائے گا ۔
ذرائع نے مزید بتایا کہ آغا سراج درانی سے مثبت سمت میں تحقیقات جاری ہیں ۔ واضح رہےکہ نیب نے گزشتہ روز اسپیکر سندھ اسمبلی آغا سراج درانی کو آمدن سے زائد اثاثوں کے کیس میں اسلام آباد سے گرفتار کیا اور اسی روز کراچی میں ان کی رہائش گاہ پر چھاپہ بھی مارا گیا ۔ وزیراعلیٰ سندھ مراد علی شاہ نے نیب اہلکاروں پر الزام عائد کیا تھا کہ اہلکاروں نے آغا سراج درانی کے اہلخانہ سے بدسلوکی کی اور ان کی صاحبزادی سے دستاویزات پر زبردستی دستخط کرائے ۔
The post نیب نے آغا سراج درانی کے گھر چھاپے میں کیا کچھ برآمد کیا ، تفصیلات سامنے آگئیں appeared first on Urdu News.