سپریم کورٹ آف پاکستان نے ڈیم فنڈ کا نام تبدیل کرنے کی اجازت دیدی ۔ عدالت عظمیٰ نے حکم دیا ہے کہ دیامربھاشا ڈیم کے فنڈز کا نیا نام سپریم کورٹ وزیراعظم ڈیم فنڈز ہوگا ۔ تفصیلات کے مطابق چیف جسٹس ثاقب نثار کی سربراہی میں بنچ نے ڈیم فنڈ کے نام کی تبدیلی سے متعلق سٹیٹ بینک کی درخواست کی سماعت کی ، نمائندہ سٹیٹ بینک نے عدالت کو بتایا کہ فنڈزکا پہلے نام سپریم کورٹ دیامر بھاشا ڈیم فنڈز تھا ، وزارت خارجہ نے نام وزیراعظم چیف جسٹس ڈیم فنڈ رکھ دیا ۔
چیف جسٹس پاکستان نے کہا کہ وزیراعظم نے فنڈز کا نام بدلنے کیلئے مجھ سے اجازت لی تھی ، وزیراعظم نے کہا تھا فنڈز کو جوائن کرنا چاہتے ہیں ، وزیراعظم کا مقام ہے ، ہمیں اس پرکوئی اعتراض نہیں ، چیف جسٹس ثاقب نثار نے کہا کہ نام بدلنے کی بنچ سے اجازت نہیں لی گئی تھی ، ہم نے کہا فنڈز آنے چاہئیں ، نام بےشک کوئی بھی ہو ، ہمارا کوئی انا کا مسئلہ نہیں ۔
ایڈیشنل اٹارنی جنرل نیئر رضوی نے کہا کہ اکاؤنٹ کا نام تبدیل کرنے سے کچھ مشکلات آئیں گی ، اشتہارات میں اب فنڈزکا نام تبدیل کرنا پڑے گا ، جسٹس اعجاز الاحسن نے ریمارکس دیتے ہوئے کہا کہ پرانے اشتہارات ایسے ہی چلنے دیں ، نئے اشتہارات میں فنڈزکا نام تبدیل کرلیا جائے ، ایڈیشنل اٹارنی جنرل نے کہا کہ ڈیم فنڈزکے عطیات کو ٹیکس سے مستثنیٰ کردیا ۔ عدالت نے ڈیم فنڈ کا نام تبدیل کرنے کی اجازت دیتے ہوئے دیامر بھاشا ڈیم کے فنڈز کو نیا نام سپریم کورٹ وزیراعظم ڈیم فنڈز کردیا ۔
The post سپریم کورٹ نے دیامر بھاشا ڈیم کے فنڈز کا نام تبدیل کرکے سپریم کورٹ وزیراعظم ڈیم فنڈز کردیا appeared first on Urdu News.